सिपिएल खेल्न सन्दीप उत्साहित

विक्रम गिरी, काठमाडौँ, १४ साउन । विश्वभर कोरोना भाइरसको महामारीको कहर थियो । यस्तोमा विश्व खेलकूदमा प्रत्यक्ष असर पर्यो । कोरोना भाइरसको सङ्क्रमण बढ्दै जाँदा नेपाल सरकारले गत चैत ११ गतेदेखि बन्दाबन्दी लागू गर्यो । यसको प्रत्यक्ष मारमा चर्चित क्रिकेट खेलाडी सन्दीप लामिछाने पनि पर्नुभयो । उहाँ यसबीचमा चार महिना बन्दाबन्दीमा घरमै बस्नुभयो । “समय व्यतित गर्न निकै गाह्रो भयो”, कीर्तिपुरस्थित त्रिभुवन विश्वविद्यालयको क्रिकेट मैदानमा भेटिनुभएका लामिछानेले भन्नुभयो, “घरमा बस्दा बस्दा निकै छटपटी भयो ।”

गत असार २२ गते लामिछानेले सुखद खबर प्राप्त गर्नुभयो । ट्रिनिडाड एण्ड टोबागोमा भदौ २ गतेदेखि २५ गतेसम्म सञ्चालन हुने क्यारेबियन प्रिमियर लिग (सिपिएल)का लागि उहाँ छनोट भएको खबर आयो । आफूले मागेकै पारिश्रमिकमा खेल्न पाउने खबरले उहाँ कम्ता खुशी हुनु भएन । लामिछानेले सिपिएलका लागि आफ्नो अनुबन्धित मूल्य ९० हजार अमेरिकी डलर तोक्नुभएको थियो । जमैका तलावाजले उक्त रकममै लामिछानेलाई अनुबन्ध गर्यो

यसअघि सन् २०१९ मा उहाँलाई बार्बाडोस ट्राइडेन्सले ७० हजार डलरमा अनुबन्ध गरेको थियो । उक्त प्रतियोगितामा लामिछानेले पाँच खेलमा सात विकेट लिनुभएको थियो । यस्तै सन् २०१८ मा सेन्ट किट्स एण्ड नाभिस प्याट्रियट्सले मात्र पाँच हजार डलरमा लामिछानेलाई अनुबन्ध गरेको थियो । सो प्रतियोगितामा उहाँले छ खेलमा आठ विकेट लिनुभएको थियो ।

आफूले चाहेकै पारिश्रमिक पाउने भए पनि लामिछानेलाई खुशी त मिल्यो तर यस्तो बन्दाबन्दीमा ट्रिनिडाड एन्ड टोबागो कसोगरी पुग्ने भन्ने चिन्ताले सतायो । नेपालमा अझै आगामी भदौ १ गतेसम्मका लागि अन्तरराष्ट्रिय हवाई उडान बन्द थियो । “हिजोसम्म सिपिएल खेल्न पाइन्छ कि पाइन्न भन्ने दुविधा थियो”, लामिछानेले भन्नुभयो, “आज जहाजको टुङ्गो लाग्यो, अब सिपिएल खेल्न उत्साहित छु ।” पछिल्लो समय जहाजको टुङ्गो नलाग्दा कैयौँ रात निद्रा नै भङ्ग भएको उहाँको भनाइ थियो । “जे होस् अब जान पाइने भयो, अब खेल्ने पाइनेमा ढुक्क छु”, आफ्नो गृह मैदानमा खुशी हुँदै लामिछानेले भन्नुभयो ।

कोरोना भाइरसका कारण अन्तरराष्ट्रिय हवाई उडान बन्द भएकाले लामिछाने सिपिएल गुमाउने अवस्था थियो । अन्तिम समयमा चार्टर्ड विमानमार्फत उहाँ बिहीबार दक्षिण कोरियाहुँदै ट्रिनिडाड एन्ड टोबागो उड्ने निश्चित भएको हो । लामिछानेको यात्रा सुनिश्चित गराउनमा उहाँका व्यवस्थापक रमन शिवाकोटीको भूमिका अह्म छ । शिवाकोटीको हप्तौँको दौडधूपले लामिछानेको ट्रिनिडाड एन्ड टोबागो उड्ने निश्चित भएको हो ।

“पर्यटन तथा नागरिक उड्डयन मन्त्रालय, युवा तथा खेलकूद मन्त्रालयलगायतको सहयोगले सन्दीप खेल्न जाने टुङ्गो लागेको हो”, शिवाकोटीले भन्नुभयो । सन्दीपको हवाई उडानका लागि केही खेलप्रेमीको रातदिनको दौडधूप सम्झिन लायक रहेको उहाँको भनाइ थियो । “हाम्रो व्यक्तिगत प्रयासले सिपिल खेल्न पाउने सम्भावना थिएन”, सहयोगीप्रति अभार प्रकट गर्दै व्यवस्थापक शिवाकोटीले भन्नुभयो ।

बिहीबार उडे पनि लामिछाने आइतबार मात्र ट्रिनिडाड एण्ड टोबागो पुग्नुहुनेछ । यसका लागि उहाँले नेपालबाट कोरियन एअरलाइन्सको चार्टर्ड विमानमार्फत कोरिया, त्यहाँबाट अमेरिका हुँदै ट्रिनिडाड एण्ड टोबागोको हवाई यात्रा तय गर्नुपर्नेछ । “त्यहाँ पुगिसकेपछि १४ दिन क्वारेन्टिनमा बस्नुपर्ने हुन्छ”, लामिछानेले भन्नुभयो । सिपिएल खेल्न जानुअघि उहाँले मङ्गलबार ललितपुरको स्टार हस्पिटलमा कोरोना परीक्षण गराउनुभएको थियो । उहाँले परीक्षणको रिपोर्ट आज प्राप्त गर्नुभएको छ । “कोरोना परीक्षणको रिपोर्ट नेगेटिभ आएको छ, अब ढुक्कका साथ जान पाउने भए”, लामिछानेले भन्नुभयो ।

लामिछानेको टोलीमा विश्व क्रिकेटका प्रख्यात खेलाडी आन्द्रे रसेल, कार्लोस ब्रेथवेट, तरबेज शाम्सी, ओशन थोमसलगायत छन् । उहाँ आबद्ध जमैका तलाबाजले आगामी भदौ ३ गते सेन्ट लुसिया जौक्ससित खेल्नेछ । सिपिएलका लागि विश्वका २३ देशका ५३७ खेलाडीले नाम दर्ता गराएका थिए ।

ट्रिनिडाड एन्ड टोबागोबाट लामिछाने इण्डियन प्रिमियर लिग (आइपिएल) खेल्न संयुक्त अरब इमेरेटस् (युएई) जानु हुनेछ । कोरोना महामारीका कारण यसपटक आइपिएलको १३औँ संस्करण असोज पहिलो सातादेखि युएइमा हुँदैछ । लामिछाने आइपिएलमा दिल्ली क्यापिटल्सबाट खेल्नुहुनेछ । लामिछाने तेस्रोपटक आइपिएल खेल्न लाग्दै हुनुहुन्छ । “अब चाँडै नेपाल फर्किने सम्भावना छैन, तर जहाँ गए पनि नेपालको इज्जत र प्रतिष्ठाका खेल्छु”, लामिछानेले छुट्टिने बेला भन्नुभयो ।

त्रिवि खेल मैदानका कर्मचारीलाई लामिछानेद्वारा एक लाख सहयोग

राष्ट्रिय क्रिकेट टोलीका सदस्य लामिछानेले त्रिवि क्रिकेट मैदानमा कार्यरत कर्मचारीलाई रु एक लाख सहयोग गर्ने घोषणा गर्नुभएको छ । सिपिएल खेल्न ट्रिनिडाड एण्ड टोबागो उड्नुअघि आज त्रिवि क्रिकेट मैदानमा आयोजित पत्रकार सम्मेलनमा उहाँले उक्त सहयोगको घोषणा गर्नुभएको हो ।

“कोरोना भाइरसको महामारीका बीच पनि उहाँहरुले निकै मेहनत गरी मैदानलाई खेल्न लायक बनाउनुभयो”, लामिछानेले भन्नुभयो, “यसरी मैदान तयार नगरेको भए हामी खेल्नसक्ने थिएनौँ ।” कोरोना महामारीमा कर्मचारी पीडामा बाँचिरहेको र आफ्नोतर्फबाट सकेको सहयोग गर्न पाएकामा खुशी लागेको लामिछानेले बताउनुभयो ।

“मैदानको रेखदेख गर्ने कर्मचारीले समयमा पारिश्रमिक पाउनुभएको रहेनछ”, उहाँले भन्नुभयो, “मैले सानो सहयोग गर्न खोजेको छु ।” मैदानमा दिनरात खटिने कर्मचारीलाई भविष्यमा पनि आफ्नो सक्दो सहयोग जारी रहने उहाँको भनाइ थियो । हाल त्रिवि मैदानमा १४ कर्मचारी काम गर्दै आएका छन् । रासस

१४ श्रावण २०७७, बुधबार २२:०६ मा प्रकाशित

प्रतिकृया दिनुहोस

विशेष

सबै

दसैंमा ‘लकडाउन’ हुनसक्ने !

काठमाडौं । स्वास्थ्य तथा जनसंख्या मन्त्रालयले संक्रिय संक्रमितको संख्या २५ हजार नाघेमा फेरि लकडाउन गर्न सिफारिस गरेको छ..

साढे ९८ लाख वित्तीय अपराध गरेको अभियोगमा राईविरुद्ध मुद्दा दर्ता

काठमाडौँ । दुबईबाट साढे ९८ लाख रुपैयाँ नेपालमा रूपान्तरण गरी वित्तीय अपराध (सम्पत्ति शुद्धीकरण) गरेको अभियोगमा..

कोरोना सामान्य रोग होइन : क्याप्टेन विजय लामा

काठमाडौं । नेपाल एयरलाइन्सका वरिष्ठ क्याप्टेन विजय लामाले कोरोना संक्रमणलाई सामान्य रुपमा नलिन आग्रह सबैलाई..

राष्ट्रसङ्घलाई सुदृढ र सशक्त बहुपक्षीयताको केन्द्र बनाउनुपर्नेमा प्रधानमन्त्रीको जोड

काठमाडौं । प्रधानमन्त्री केपी शर्मा ओलीले विश्वले झेल्नुपरेका जटिल चुनौतीहरुको सामना गर्न संयुक्त..

कोरोना संक्रमणबाट नेपालमा थप १६ जनाको मृत्यु, ११५४ संक्रमित थपिए

काठमाडौँ । पछिल्लो २४ घण्टामा नेपालमा थप १ हजार १५४ जनामा कोरोना सङ्क्रमण पुष्टि भएको छ । योसँगै नेपालमा कोरोना..