कविता हत्याको न्याय खोज्दै परिवार

राजेन्द्रप्रसाद पनेरु, कञ्चनपुर, २५ चैत । कृष्णपुर नगरपालिका–८ शान्तिपुरका ४२ वर्षीय कर्णबहादुर विष्ट न्यायको खोजीमा भौतारिरहनुभएको छ । उहाँकी १७ वर्षीया छोरी कविताको हत्या भएको १० महीना बिते पनि न्याय पाउने आशा नमरेको कृष्णबहादुरले बताउनुभयो ।

कविताका बुबा कर्णबहादुरलाई मुद्दाका लागि आवश्यकपर्ने प्रमाण पर्याप्त जुटाउन नसक्दा पक्राउ परेका अभियुक्तमाथि कम सजाय हुनसक्नेमा चिन्तित बनाएको छ । “हत्यालाई आत्महत्या बनाउने प्रयास गरिएको छ”, उहाँले भन्नुभयो, “हातको छाप नलागोस् भनेर शवलाई जमीनमुनि गाड्दा अभियुक्तले सावधानीपूर्वक पातले समातेर राखेको देखिएको छ, वर्षात्को भेलले शव बाहिर निकालेपछि स्याललगायतका जनावरले खाएको अवस्थामा शव फेला परेको थियो ।”

यस्तो अवस्थामा प्रहरीले गम्भीरतापूर्वक अनुसन्धान नगर्दा पर्याप्त प्रमाण जुटाउन नसकेको उहाँको भनाइ छ । कविताको हत्यामा संलग्न रहेका भनिएका कृष्णपुर–२ का मदन गिरी र भरत बोहरा पक्राउ परेर अहिले पुर्पक्षका लागि कारागारमा छन् । पक्राउ परेका दुवै अभियुक्तमाथि अपहरण, जबर्जस्तीकरणी र ज्यान मुद्दा लगाइएको छ । तीनवटै मुद्दा जिल्ला अदालतमा विचाराधीन अवस्थामा छन् । गिरीसँगै कवितालाई जान लागेको देखेपछि स्थानीयको खबरले गिरी पक्राउ परेका हुन् । “पक्राउपछि गिरीले घटनास्थल देखाएर कविताको कपडाका आधारमा भेटिएको शवको कङ्कालबाट छोरीकै शव रहेको भनेर पहिचान भएको हो”, कृष्णबहादुरले भन्नुभयो ।

नगरपालिकाको लालझाडी मोहना संरक्षण वनको अमखैया भन्ने ठाउँमा कविताको गत असार ३१ गते हत्या गरी शव माटोमुनि गाडिएका अवस्थामा फेला परेको थियो । घरबाट किताब खरीद गर्न गत असार २६ गते कैलालीको अत्तरीया जान्छु भनी गएकी कविताको शव ९कङ्काल० परिवारजनले आमखैयाको खोलामा गाडिएको अवस्थामा गिरीको बयानका आधारमा छ दिन प्रहरीले पछि फेला पारेको थियो ।

गिरीलाई प्रहरीले शुक्लाफाँटा नगरपालिका–८ को फुलेलीमा ससुरालीमा रहेकाबेला र बोहरालाई भीमदत्तनगरपालिकाको महेन्द्रनगर क्षेत्रबाट पक्राउ गरेको थियोे । प्रहरीलाई दिएको बयानमा उनीहरुले कविताको सामूहिक बलात्कारपछि हत्या गरेर खाल्डोमा पुरेको भनेर जिल्ला प्रहरीले तत्कालीन समयमा गरेको पत्रकार सम्मेलनमा भने पनि अदालतमा पेश गर्दा प्रहरीले आत्महत्या भनेर अनुसन्धान प्रतिवेदन बुझाएको बताइएको छ ।

हत्यालाई आत्महत्या बनाइ मुद्दालाई अन्यत्रै मोडने कार्य नहोस्, अपराधीमाथि हदैसम्मको कारवाही गरियोस्”, कर्णबहादुले भन्नुभयो । तत्कालीन प्रहरी उपरीक्षक डिल्लीराज विष्टले अनुचित प्रभावमा परेर कविताको हत्यालाई आत्महत्या भनेर अदालतमा पेश गरेको उहाँको आरोप छ ।

न्यायका लागि प्रदेशदेखि केन्द्र सरकारसँग गुहार
न्यायकै लागि कृष्णबहादुरले प्रदेश सरकारदेखि केन्द्र सरकारसम्म गुहार माग्नुभएको छ । प्रदेशसभा सदस्यदेखि प्रतिनिधिसभाका सांसदहरुको हस्ताक्षर गरेर गृह मन्त्रालय र प्रधानमन्त्रीको निजी सचिवलाई भेटेर ज्ञापनपत्र बुझाएको कर्णबहादुरले बताउनुभयो । “राहत रकम उपलब्ध गराइदिन र छोरीका हत्यारामाथि हदैसम्मको कारवाहीका लागि ज्ञापनपत्र बुझाएको छु”, उहाँले भन्नुभयो, “आश्वासनबाहेक हालसम्म केही पनि पाइएको छैन ।”

प्रदेश सरकारको राहतले मुद्दा लड्नमै ठिक्क

प्रदेश सरकारले दिएको रु पाँच लाख राहत रकमले कृष्णबहादुरले कविताको न्यायका लागि मुद्दा लड्नमै ठिक्क भएको बताउनुभयो । कैलालीस्थित लक्ष्मी कत्था उद्योगमा काम गर्दै आउनुभएका कर्णबहादुरको जागिर कविताको मुद्दा लड्नमै समय बितेपछि छुटेको छ । रासस

२५ चैत्र २०७५, सोमबार २१:४५ मा प्रकाशित

प्रतिकृया दिनुहोस

Email Subscription

विशेष

सबै

११ सय बढीको कोरोना परीक्षण, ९९ जना आईसोलेसनमा

काठमाडौँ, १९ चैत्र । स्वास्थ्य मन्त्रालयले १ हजार १३३ जनामा कोरोना भाइरसको परीक्षण गरिएको जनाएको छ । मन्त्रालयका प्रवक्ता डा. विकास..

वीर अस्पतालमा मृत्यु भएका दुबैको रिपोर्ट नेगेटिभ

काठमाडौँ, १८ चैत्र । वीर अस्पतालमा मृत्यु भएका दुई जनामा कोरोना भाइरसको संक्रमणको आशंका गरिएपनि उनीहरुको..

कोरोना रोक्न सरकारले बनायो ७ कार्यदल, कुनमा कसको नेतृत्व ?

निरोज कुमार थापा, काठमाडौँ, ९ चैत्र । सरकारले कोरोना भाइरस रोग रोकथामको पूर्व तयारी सकिएको भन्दै कार्यान्वयनमा..

देशैभरका अदालत २ हप्ताका लागि बन्द

काठमाडौँ, ७ चैत्र । देशभरका अदालत आगामी २ हप्ताका लागि बन्द भएका छन् । शुक्रबार सर्वोच्च अदालतमा..

राष्ट्रिय सभाले नै मानेन सरकारी निर्णय

निरोज कुमार थापा, काठमाडौँ, ६ चैत्र । राष्ट्रिय सभाले सरकारी निर्णयको अवज्ञा गर्दै बैठक सञ्चालन गरेको छ ।..