देशले चुनाव चाहेकै छैन : शम्भु थापा

० मङ्सिर ४ गतेका लागि घोषित संविधानसभाको निर्वाचन होला ?
– यसका पण्डितहरू पाँचजना हुन्, उनीहरूलाई नै सोध्नुपर्छ ।
० को–को हुन् त यसका पण्डित ?
– एकजना खिलराज रेग्मीजी, त्यसपछि पुष्पकमल दाहाल, सुशील कोइराला, झलनाथ खनाल र विजयकुमार गच्छदार हुन् । लोकतन्त्र र प्रजातन्त्रको कर्मकाण्ड गर्न बसेको उहाँहरू हो ।
० उहाँहरू त निर्वाचन तोकिएकै मितिमा हुन्छ भन्दै हुनुहुन्छ नि ?
– पाँचजना नै हुन यो देशमा लोकतन्त्र र प्रजातन्त्रको कर्मकाण्ड गर्न बसेका, अब उनीहरूले जस्तो कर्मकाण्ड गर्छन् निर्वाचन त्यसैमा भर पर्छ ।
० नेकपा–माओवादीबाहेकको चुनावले राजनीतिमा कस्तो असर पार्छ ?
– कर्मकाण्डमा विधि छाड्दाखेरि त्यसको असर के पर्छ भन्ने विषयमा पाँचजना पण्डितहरूलाई राम्ररी थाहा छ । इजिप्टमा मोर्सीलाई हटाउँदा विरोधबाट हटाए तर अहिले सेनाले आफ्नै समर्थनका लागि आउनुस् नारा–जुलुस गर्नुस् भन्नुपर्‍यो । सेनाले अहिले गोली चलाएर मान्छे मारिरहेको छ । राजनीतिमा म मात्रै रहुँ भन्ने भइसकेपछि अरूले पानीजस्तो भएर निकास त खोज्छन्–खोज्छन् । त्यसबेला कोही समुद्रमा पुग्छन् कोही बाटोमै बिलाउँछन् । समुद्रमा पुग्यो भने त त्यसले ठूलो ज्वारभाटाको रूप लिन्छ । बीचैमा हरायो भने कर्मकाण्डीहरूकै समुद्र हुन्छ । यसको प्रभाव मङ्सिर ४ मा मात्रै होइन मङ्सिर ४ अघिदेखि पछिसम्म हुन्छ ।
० खिलराज रेग्मीले वैद्य पक्षलाई चुनावमा सहभागी गराएर लान सक्नुहुन्छ कि सक्नुहुन्न ?
– संविधान नै उहाँहरूले तयार गर्नुभएको छ, त्यसैले कर्मकाण्ड गर्ने ठाउँ कहाँ छ भन्ने कुरा त उहाँहरूलाई राम्ररी थाहा होला नि । म कर्मकाण्ड गर्ने बाहुन नै होइन । म त कमाएर खाने नेपालीभित्र परँे । त्यसैकारण जजमानहरू को–के छन् भन्ने कुरा त कर्मकाण्ड गर्ने बाहुनहरूलाई थाहा भइहाल्छ नि ।
० उनीहरूले त वैद्य नआए पनि चुनाव गरेर संविधान दिन्छौँ भनिसके ?
त्यसो भए गरे भइहाल्यो नि । चुनाव गर्छौं–गर्छौं भनेर हिँड्ने कुरा नै होइन नि । चुनाव त पद्धति हो प्रक्रिया हो । उल्लास हो, उत्सव हो । जसरी पनि गर्ने भनेर हुन्छ र ?
० सेना लगाएर भए पनि चुनाव गर्ने रे ?
– अहिलेसम्म त्यही कामको अभाव थियो । यदि गर्न लागेको हो भने अहिलेसम्मको सबैभन्दा राम्रो काम त्यही होला ।
० असन्तुष्ट पक्षलाई पेलेर चुनाव गराउन सकिन्छ कि सकिँदैन ?
– पेलेर चुनाव हुन्छ कि हुँदैन भन्ने कुरा त असन्तुष्ट पक्षलाई पो सोध्नुपर्छ । चुनाव बहिष्कार गर्न पाइन्छ तर बिथोल्नचाहिँ पाइँदैन भनेर गृहमन्त्रीले नै भनेका छन् अब बहिष्कारभित्र बिथोल्ने कुरा पर्छ कि पर्दैन ?
० दोस्रोपटक संविधानसभाको निर्वाचन नेपालमा हुन्छ कि हुँदैन ?
– अहिले देशले चुनाव चाहेकै छैन । देशले चुनावको नामको चुनाव मात्रै चाहेको छैन । कसैको बुई चढेर गर्न खोजिएको चुनाव देशलाई चाहिएको छैन ।
० कसको बुई चढेर यो चुनाव गर्न लागिएको हो त ?
– तपाईं आफँै हेर्नुस् खिलराज रेग्मी कसको बुई चढेका छन् । यिनी संविधानको बुई चढेका हुन् त ? त्यो त म देख्दिनँ ।
० तर, मान्छेहरू त संविधानसम्मत सरकार बनेको भन्छन् ?
– मान्छेहरू त भन्छन् तर संविधानसम्मत भएको छैन भन्ने मान्छेहरू पनि छन् नि । प्रधानन्यायाधीश मात्र हुँदा उहाँको नाममा विवाद थियो र ?
० प्रधानन्यायाधीशबाट राजीनामा दिनुपर्छ ?
– मेरो भनाइ एउटा मात्रै छैन । देशको प्रधानन्यायाधीशले नै संविधान भत्काएर मै देशको प्रमुख हुँ भन्नु र त्यसलाई चार दलका शीर्ष नेताले साक्षी किनारा बस्नुले संविधानसभाबाट कस्तो किसिमको संविधान बनाउन खोजिएको हो मैले बुझ्न सकेको छैन । संविधान भनेको विश्वास हो आस्था हो । विश्वास भत्किएको, आस्था भत्किएको संविधान कसरी टिक्छ । मेरो भनाइ त २५बुँदे नै खारेज हुनुपर्छ भन्ने हो । बाधा अड्काउले मूल संविधान भत्काउने कुरा हुँदैन । चारजना र रेग्मीले देशको मूल कानुनलाई झुर कानुन बनाइदिएका छन् । उहाँकै विरोधमै मुद्दा गर्नुपरेको छ योभन्दा लज्जास्पद स्थिति नै हुँदैन ।
० अब राष्ट्रपतिको भूमिका के हुनसक्छ ?
– राष्ट्रपतिको कुरा राष्ट्रपतिलाई नै सोध्नुस् । हामी राष्ट्रपतिकोमा गएर कुरा पनि राख्यौँ । तर, उहाँले अर्कै गर्नुभयो । हामीले भनेको कुरा मान्नुभएन । हामीले त उहाँलाई सबै उघ्रिन आँट्यो, कम्तीमा छोप्ने लँगौटी पनि छ कि छैन भनेर सोध्यौँ ।

१६ श्रावण २०७०, बुधबार ११:१८ मा प्रकाशित

प्रतिकृया दिनुहोस

विशेष

सबै

यो साता विदेशमा थप एक नेपालको निधन

लन्डन । विश्वव्यापी महामारी कोरोना भाइरस (कोभिड–१९) संक्रमणबाट यो साता विदेशमा थप एकजना नेपालीको ज्यान गएको छ । गैरआवासीय नेपाली..

कर्णाली सरकारले कोभिड सङ्क्रमितको निःशुल्क उपचार गर्ने

काठमाडौं । कर्णाली प्रदेश सरकारले कोभिड –१९ का लक्षणसहितका बिरामीको निःशुल्क परीक्षण तथा उपचार गर्ने भएको छ ।..

घटस्थापनापछि सात दिनमा दुई लाख बढीले छाडे उपत्यका

काठमाडौं । घटस्थापनापछि सात दिनमा दुई लाख बढीले उपत्यका छोडेका छन् । महानगरीय ट्राफिक प्रहरी महाशाखाका अनुसार..

प्रधानमन्त्री केपी शर्मा ओलीद्वारा राष्ट्रको नाममा सम्बोधन (पूर्णपाठसहित)

आदरणीय दिदीबहिनी तथा दाजुभाइहरू, नेपालीहरुको ठूलो चाड, बडादशैं शुरु भइसकेको छ। यस महान् अवसरमा सर्वप्रथम म..

गोरखाबाट हनुमानढोका दरबारका लागि पठाइयो फूलपाती

गोरखा दरबारस्थित दशैँघरबाट काठमाडौँको हनुमानढोका दरबारका लागि फूलपातीसहितको डोली पठाइएको छ । विधिपूर्वक..