मंसिर ४ पछि यो देशमा एमाओवादी कहाँ थियो भनी खोज्नुपर्ने हुन्छ :: झलनाथ खनाल

० संविधानसभाको निर्वाचन शङ्काको घेरामा छ नि ? 

– निर्वाचन शङ्काको घेरामा छैन । मङ्सिर ४ गते नेपालमा संविधानसभाको निर्वाचन हुन्छ । नेकपा एमाले मङ्सिर ४ पछि अर्कै शक्तिको रूपमा उदाउँछ । 

० एमाले कमजोर भएकोले निर्वाचनमा जान चाहँदैन भन्नेहरू पनि छन् नि ?
– नेकपा एमाले ६० वर्षभन्दा लामो इतिहास बोकेको, गौरवपूर्ण सङ्घर्षका गाथा बोकेको, इतिहासका मोडहरूमा परीक्षित भएको र सही सिद्धान्त बोकेको पार्टी हो । यस्तो पार्टी निर्वाचन आउँदैमा खुट्टा कमाउँदैन, निर्वाचनलाई स्वागत गर्छ । जनतामा परीक्षित भएर देशको ठूलो पाटीको रूपमा उदाउँछ । निर्वाचनबाट एमालेले डिस्टिङ्सन ल्याउँछ ।

० एमालेलाई धेरै नेताले छाडिसके कसरी नम्बर वन होला ?
– रूखका वरिपरि एकाध पात झरेका हुन्छन्, तर एकाध पात झर्दैमा रूख सुकेर जान्छ र ? एकाध मान्छेमा अधपतन आउन सक्दछ, एकाध मान्छेले बाटो बिराउन सक्छन् । उनीहरू अहिले पश्चात्तापले डढ्दै छन् । जनताको बहुदलीय जनवादजत्तिको सही सिद्धान्त यो देशमा अर्को छैन ।
अहिले जो छाडेर गएका छन् भोलि आत्मालोचना गरेर आउने पार्टी पनि एमाले नै हो । तपार्इंले एमालेबाट गएका दुई–चारजनाको नाम लिनुभयो तर यो अवधिमा हजारौँ नेता तथा कार्यकर्ता एमालेमा आएका छन् । यो कुरा पनि देख्नुपर्‍यो ।

० प्रचण्डले त एमाले चौथो स्थानमा पुग्छ भनेर दाबी गर्नुभएको छ नि ?
– प्रचण्डजीले एमाले भन्ने पार्टी म देख्दिनँ भन्नुभयो रे, यसको जवाफमा म के भन्छु भने मङ्सिर ४ पछि यो देशमा एमाओवादी कहाँ थियो भन्ने कुरा खोज्नुपर्छ ।

० एमाओवादी एक नम्बरमै आए ?
– म त्यस्तो कल्पनै गर्न सक्दिनँ । एउटा समय थियो नेपालमा उग्रवामपन्थी विचारको बाढीपहिरो आयो । त्यो बाढीपहिरोले धेरै मान्छेलाई बिगार्‍यो, धेरै मान्छेलाई आतङ्कित पनि बनायो । धेरै मानिसलाई विचलित पनि बनायो । र, ती विचलित मानिसले समेत मतदान गरेपछि एमाओवादी पहिलो पार्टी बन्यो । तर, अब कसैको दाबीले हुनेवाला छैन । देशमा अर्कै किसिमको परिस्थिति सिर्जना भइसकेको छ । अब एमाओवादी पहिलो निर्वाचनदेखि अहिलेसम्म आउँदा हरेक हिसाबमा खुइलिइसकेको छ । उसप्रतिको चार्म पनि समाप्त भइसकेका छन् । उसका नीति–कार्यक्रम के हुन्, ऊ कुन चरित्रको पार्टी हो– त्यो पनि प्रस्ट भइसकेको छ । राष्ट्रियताप्रतिको उसको धारणा के हो– त्यो पनि जनताले बुझ्ने मौका पाइसकेका छन् । लोकतन्त्रप्रतिको प्रतिबद्धता कस्तो रहेछ, भ्रष्टाचारको मामिलामा कस्तो रहेछ– जनताले त्यो पनि बुझिसकेका छन् । त्यसैले अब एमाओवादीको भविष्य सकियो । तेस्रो, चौथो शक्ति होला ।

० नेकपा–माओवादीले बहिस्कार गरेको अवस्थामा पनि तपाईंहरू निर्वाचन गराउन सक्नुहुन्छ ?
– चुनाव नहुने कल्पना नगरौँ । मोहन वैद्य परिपक्व नेता हुनुहुन्छ । मेरो त उहाँ अत्यन्तै घनिष्ठ मित्र पनि हुनुहुन्छ । उहाँले धेरै परिपक्वताका साथ सोच्नुपर्छ । यतिबेला नेपाली राजनीति जसरी अघि बढिरहेको छ, नेपालको लोकतन्त्र जसरी अघि बढिरहेको छ, नेपालको जनवादी क्रान्ति जसरी अघि बढिरहेको छ यस्तो बेलामा कुनै पनि कम्युनिस्ट पार्टीले निर्वाचनलाई बहिस्कार गर्नुहुँदैन । निर्वाचनलाई बहिस्कार गर्नु भनेको उग्रवामपन्थी गल्ती हुन्छ । यस्तो बेलामा बहिस्कारले पार्टीलाई जनताबाट आइसुलेट गर्छ । अलगथलग पार्छ । त्यस्तो अवस्थामा काम गर्न दलहरूलाई अप्ठ्यारो हुन्छ । त्यसैले नेकपा–माओवादीले पनि चुनावमा माग लिओस् भन्ने आमनेपालीको चाहना छ ।

० उहाँहरूका मुद्दा कसरी सम्बोधन गर्नुहुन्छ ?
– हामी मङ्सिर ४ गते निर्वाचन गराउने सर्तमा कुनै पनि मुद्दामा छलफल गर्न तयार
छौँ । तर, निर्वाचनलाई अस्वीकार गर्ने काम नगरौँ ।

० यो सरकार बर्खास्त गर्न तयार हुनुहुन्छ ?
– मङ्सिर ४ गते निर्वाचन नगरौँ, मङ्सिर ४ गते निर्वाचन गराउने सरकार हटाऊ यस्तो
कुरा मान्य हँुदैन । यो सरकार उभ्याउने ११बुँदे राजनीतिक सहमति र २५बुँदे बाधा–अडकाउ फुकाउ आधार हटाऊ भन्ने कुरा पनि मान्य हुनेवाला छैन । राजमार्गलाई जति ठूलो पनि बनाउन सकिन्छ, तर कोरेको गोरेटो बदलिँदैन नि । मङ्सिर ४ गते पुग्ने गोरेटो बनिसक्यो, यो गोरेटोलाई राजमार्ग बनाउन सकिन्छ, तर त्यसलाई बन्द गर्न र भत्काउन सकिँदैन ।

० गोलमेच सम्मेलनका लागि तयार हुनुहुन्छ ?
– गोलमेच सम्मेलन त सधैँ भएकै छ नि । राजनीतिक पार्टीहरू जहाँ बस्छन् त्यहाँ गोलमेच त भइहाल्छ । त्यस्तोमा माओवादी सहभागी भए सुनमा सुगन्ध हुन्छ ।
० वैद्य समूह चुनावमा नआए पनि चुनाव हुन्छ कि हुँदैन ?
– चुनाव त अब यो धर्तीका कुनै पनि तागतले रोक्नै सक्दैन । मङ्सिर ४ गते नेपालमा चुनाव भयो–भयो । यो कुरामा पूरा विश्वास लिएर चल्नुस् । किनकि मेची–महाकाली, हिमालदेखि तराईसम्मका जनता अहिले चुनावको पक्षमा छन् । चुनावको तयारीमा जनता लागिसकेका छन् । यस्तो अवस्थामा चुनाव रोक्ने काम जनताको इच्छाविपरीत हुन जान्छ ।

० एमालेको अधिवेशन कहिले हुन्छ ?
– हाम्रो पार्टीको महाधिवेशन आठौँ राष्ट्रिय महाधिवेशनले पारित गरेको विधानअनुसार हुन्छ । विधानअनुसार आगामी फागुनमा पाँचवर्षे कार्यकाल सकिन्छ । त्यसपछि तत्कालै अधिवेशन गर्न पनि सकिन्छ । सकिएन भने केन्द्रीय समितिले एक वर्ष थप्न पनि सक्छ । त्यसैले हामी केही समय पर पनि अधिवेशन गर्न सक्छौँ ।

० केपी ओलीले त तत्काल महाधिवेशन गर्नुपर्छ भन्नुभएको छ नि ?
– ओली कमरेड कहिलेकाहीँ व्यक्तिकेन्द्रित र आत्मकेन्द्रित चिन्तन बोकेर हिँड्नुहुन्छ । उहाँले तत्काल महाधिवेशनको माग गर्नुभएको छ । तर, अहिले महाधिवेशन हुन सक्दैन । राष्ट्र निर्वाचनमा छ, राजनीतिक दलहरू निर्वाचनको मैदानमा उत्रिसकेका छन् । यो प्रतिस्पर्धामा उत्रनु र एमालेलाई पहिलो पार्टी बनाउनु सबै नेता तथा कार्यकर्ताहरूको केन्द्रीय दायित्व हो । यो केन्द्रीय दायित्वलाई छाडेर महाधिवेशन घोषणा गर्‍यौँ भने त हामी चुनाव छाडेर त्यतातर्फ केन्द्रित  हुन्छौँ। महाधिवेशन चानचुने कुरा होइन, यो त पार्टीको सर्वोच्च संस्था हो । त्यसैले अहिले निर्वाचनमा ध्यान केन्द्रित गर्नुपर्छ । निर्वाचन सकिएपछि हामी महाधिवेशनमा जान्छौँ ।

० केन्द्रीय समिति विघटन हुँदैन ?
– अहिले केन्द्रीय समिति विघटन गर्ने होइन अझै विस्तार र बलियो बनाएर जानुपर्छ । राष्ट्रव्यापी रूपमा कमान्ड सम्हाल्ने गरी जानुपर्नेछ । महाधिवेशन र निर्वाचन पार्टीको लागि उस्तै हुन्छ । त्यसैले एउटै म्यानमा दुईवटा तरबार हालेर हिँड्न सकिँदैन ।

० तपाईंलाई त केपी ओलीले असफल नेतृत्व भन्नुभएको छ ?
– यो उहाँको मानसिकतामा रहेको समस्या हो । यस्तो कुरा एकैचोटि पेपरमा किन बाहिर ल्याउनुभयो । यी कुरा त पार्टी केन्द्रीय कमिटीमा छलफल गर्नुपर्ने विषय हो । एउटा अनुशासित नेताको व्यवहार भएन । बाहिर हल्ला गर्ने कामले उहाँलाई नै राम्रो गर्दैन । यो विषयमा म केन्द्रीय कमिटीमा कुरा उठाउँछु ।

० तपाईंको नेतृत्वमा चुनाव हारिन्छ भनेर केपी ओलीले नेतृत्व परिवर्तनको कुरा उठाउनुभएको हो भनिन्छ ?
– मेरो नेतृत्वमा अहिले पार्टीभित्र सामूहिक नेतृत्व अघि बढिरहेको छ । त्यस्तो दाबी गर्नेहरू पनि तिसमार खाँ छैनन् ।

१२ असार २०७०, बुधबार ०६:३३ मा प्रकाशित

प्रतिकृया दिनुहोस

विशेष

सबै

अमेरिकामा एकै दिन थपिए ९१ हजार ५३ कोरोना संक्रमित

न्यूयोर्क । हिजो बिहीबार अमेरिकामा ९१ हजार ५० जना कोरोना भाइरसका संक्रमित थप भएका छन् । यो अहिलेसम्मकै संक्रमितको संख्या बढी हो ।..

मुकेश चौरसिया हत्याको किटानी जाहेरी दर्ता

पर्सा । पर्साको बिन्दाबासिनी गाँउपालिकाका नेकपा कार्यकर्ता मुकेश चौरसियाको हत्याको किटानी जाहेरी आज प्रहरीले..

चन्द समूहका कम्पनी कमिसारसहित दुई जना पक्राउ

काठमाडौं । नेत्रविक्रम चन्द समूहका कम्पनी कमिसारसहित दुई जनालाई मोरङ प्रहरीले पक्राउ गरेको छ । पक्राउ पर्नेमा..

चितवनमा सङ्कलित प्लाज्मा अन्य जिल्लामा

क्षेत्रीय रक्तसञ्चार केन्द्र भरतपुरले सङ्कलित कोभिड–१९ सङ्क्रमण भई निको भएकाका प्लाज्मा अन्य जिल्लामा पठाउन..

प्रहरीको गोलीबाट अश्वेत व्यक्तिको मृत्यु भएपछि अमेरिकाको फिलाडेल्फियामा तनाव

न्यूयोर्क । अमेरिकाको पेन्सिलभेनिया राज्यस्थित फिलाडेल्फिया शहरमा प्रहरीको गोली लागेर अश्वेत व्यक्तिको..