बेइजिङबाट प्रचण्डले केही पाउनेवाला छैनन् :: झलनाथ खनाल

० बितेको एक वर्ष तपाईंहरूले बाबुराम भट्टराईको राजीनामा माग्दै गुजार्नुभयो, नयाँ सालमा देशका लागि अब के–के गर्ने योजना छ ?
– राजनीतिक रूपले घटनापूर्ण वर्ष २०६९ हामीले पार गरेका छौँ र नयाँ सम्भावना र नयाँ चुनौती बोकेको २०७० मा प्रवेश गरेका छौँ । मलाई लाग्छ– २०७० साल हाम्रो देशको इतिहासमा अत्यन्त महत्वपूर्ण सालका रूपमा स्थापित हुनेछ । किनकि, यही साल हामी संविधानसभाको अर्को निर्वाचन गर्न गइरहेका छौँ । ०६२/६३ को क्रान्तिका उपलब्धिलाई सम्पूर्ण रूपले संस्थागत गर्न हामीले अझै सकेका छैनौँ । यसलाई संस्थागत गर्नका लागि संविधानसभाबाट संविधान बनाउनैपर्ने हुन्छ । ठूलो दल एमाओवादीले त्यो भूमिका निर्वाह गर्न नसकेको जगजाहेर नै छ । अब नेकपा एमाले सबभन्दा ठूलो दल नबनेसम्म यो देशमा संविधान निर्माण हुन नसक्ने रहेछ भन्ने प्रस्ट भइसकेकाले हामी त्यसैको तयारीमा छौँ ।
० अहिलेको अवस्थामा कसरी बन्ला त एमाले सबभन्दा ठूलो पार्टी ?
– आगामी निर्वाचन वास्तवमा नेकपा एमालेको निर्वाचन हुनेछ । सम्पूर्ण जनता यतिबेला उग्रवामपन्थी अराजकताको विरुद्ध उभिएका छन् । दक्षिणपन्थी यथास्थितिवाद पनि जनता रुचाउँदैनन् । एमालेले दर्शाएको बहुदलीय जनवादको पक्षमा जनता भएकाले एमाले नै अब ठूलो दल बन्नेछ । साठी वर्षको इतिहास बोकेको एमाले संविधानसभाको दोस्रो निर्वाचनबाट पहिलो पार्टी बनेपछि यो देशको कायापलट हुनेछ ।
० चुनाव हुने कहिले–कहिले तपाईंको पार्टी पहिलो बन्यो अहिले ? निर्वाचन नै अनिश्चित बनेको भन्न थालेका छन् नि मानिस त ?
– ०७० मा जसरी पनि आमनिर्वाचन हुनेछ । आगामी कात्तिकको अन्तिम सातामा यो देशमा चुनाव हुन्छ । त्यो चुनावलाई कसैले पनि रोक्न–छेक्न सक्दैन । अहिले जस–जसले जे–जे भने पनि सबैलाई चुनाव चाहिएको छ । अन्त्यमा सबै चुनावको पक्षमा उभिनेमा म विश्वस्त छु ।
० कात्तिकमा पनि चुनाव नभए तपाईं के गर्नुहुन्छ ?
– यस्तो आशङ्का व्यक्त गर्नु रत्तिभर पनि जरुरी छैन ।
० ०६९ मा नेताहरूले बोलेका कुरा पूरा भएनन् भने अब ०७० मा तपाईंहरूका बोलीले मूर्तरूप पाउँछ भन्ने के ग्यारेन्टी ?
– आउने कात्तिक–मङ्सिरमा पहिलो कुरा– चुनाव हुन्छ, दोस्रो कुरा– चुनाव हुन्छ र तेस्रो कुरा– चुनाव हुन्छ..हुन्छ…हुन्छ । चुनाव नहोला कि भनी आशङ्का गर्नु किन पनि जरुरी छैन भने हामीसँग अहिले त चुनाव गर्नकै लागि गठित ‘चुनावी सरकार’ छ । निर्वाचन आयोग छ र हामी सम्पूर्ण दल निर्वाचनका लागि तयार छौँ, जनता भोट हाल्न तयार छन्, राष्ट्र त्यसैको प्रतीक्षा गरिरहेको छ । चुनाव हुन अरू के चाहिन्छ ?
० सबै दल तयार छन् त भन्नुभयो, तर के नेकपा–माओवादी तयार छ चुनावमा जानका लागि ?
– चुनावका लागि हामीले मूलतः तीनवटा काम गर्नुपर्ने हो, एक– कानुन बनाउने काम, दोस्रो– प्राविधिक पक्षका काम र तेस्रो– राजनीतिक वातावरण निर्माण गर्ने काम । कानुनहरू करिब–करिब बनिसकेका छन् र बाँकी पनि अब बन्छन्, प्राविधिक कार्य पनि निर्वाचन आयोगले अगाडि बढाइरहेकै छ र राजनीतिक वातावरण बनाउने काममा पक्कै केही चुनौती छन्, तथापि चुनौतीको टाउकोमा टेक्दै अगाडि बढ्ने हिम्मत गर्नुपर्छ ।
० काङ्ग्रेस सभापति सुशील कोइरालाले चार दलको सिन्डिकेटलाई ब्रेक गर्छु भनेका छन् नि, यो सम्भव छ होला ?
– हामी त्यो सिन्डिकेटलाई आफैँ तोडिदिन्छौँ र असन्तुष्ट पक्षलाई बाटो खुला गर्छौँ । बाटो खुला गरिदिएपछि उहाँहरू पनि चुनावमा आउनुहुन्छ, किनकि निर्वाचनबाहेक कसैका सामु पनि अरू कुनै विकल्प छैन यतिखेर ।
० त्यसो भए ०७० नेपालका लागि निर्वाचनकै वर्ष बन्ने भयो, होइन ?
– पक्कै पनि यो साल संविधानसभा निर्वाचनको वर्ष हुनेछ, देशको अग्रगति र प्रगतिको साल हुनेछ, नयाँ संविधान निर्माणका लागि ढोका खुला हुने साल सावित हुनेछ ।
० तर, यसका लागि दलहरूबीच मेलमिलाप र सहकार्य हुनुपर्नेमा आरोप–प्रत्यारोप सुरु भएको छ नि ?
– ठूला पार्टीबीच खास कुनै समस्या बाँकी छैनन्, अरू बाँकी दलबीच पनि हामीले छलफल जारी नै राखेका छौँ । नेकपा–माओवादीसँग पनि छलफल जारी नै छ । हामी सबै अन्ततः एकजुट भएरै अघि बढ्छौँ ।
० निर्वाचनमा गठबन्धन पनि गर्नुहुन्छ कि ?
– हाम्रा मुद्दामा सहमति जनाउनेसँग एकताबद्ध भएर जान्छौँ । हामी लोकतान्त्रिक शक्तिहरूको दुईतिहाइ बहुमत ल्याउने प्रतिबद्धताबाट अघि बढ्छौँ ।
० काङ्ग्रेस र एमालेबीच पनि चुनावी तालमेल सम्भव छ र ?
– कुरो कठिन छ, तर यो असम्भव पनि छैन भनेर बुझ्दा हुन्छ । प्रयत्न गरे के हुँदैन र ? लोकतान्त्रिक शक्तिहरू एक हुनु अत्यावश्यक छ र एक भएर नै जानेछन् ।
० तपाईं यसो भन्नुहुन्छ तर उता प्रचण्डजीले फेरि अर्को चमत्कार गर्ने कुरा गर्नुभएको छ । उहाँ चीन गइरहनुभएको छ, लगत्तै भारत जाने कुरा छ, ठूलो शक्ति आर्जन त एमाओवादीले नै गर्लाजस्तो छ नि ?
– हामीलाई राम्रोसँग थाहा छ कि चीन गएर पनि केही हुँदैन र भारत गए पनि केही हुनेवाला छैन । यहाँका कैयन मानिस दिल्ली गएर सिल्ली भएर आउँछन् । बेइजिङबाट पनि केही आउनेवाला छैन । विदेश गएर मात्र केही हुँदैन, नेपाली जनतासामु जानुपर्छ, गाउँ जानुपर्छ, जनता रिझाउनुपर्छ । मुलुकको विकासका लागि सही बाटो निर्धारण गर्नुपर्छ । विदेशी शक्तिका सामु त्वम् शरणम् गरेर मात्रै केही हुनेवाला छैन यो देशमा । कुनै व्यक्तिविशेषले कुनै देशको भ्रमण गर्नु आश्चर्यको विषय त होइन नि । पार्टीका तर्फबाट गरिएको निजी भ्रमणलाई राजनीतीकरण गरेर फाइदा उठाउने कोसिस प्रचण्डजीले नगर्दा नै उचित हुन्छ । उहाँ संसारकै भ्रमणमा निस्के पनि हामी टाउको दुखाउँदैनौँ, कुनै विरोध गर्नेवाला छैनौँ । तर, व्यक्तिगत या पार्टीगत भ्रमणलाई ‘राष्ट्रका तर्फबाट’ भनी प्रचण्डले हौवा पिटाउनुपरेको किन हो बुझ्न सकिएन ।

४ बैशाख २०७०, बुधबार ००:३२ मा प्रकाशित

प्रतिकृया दिनुहोस

विशेष

सबै

दशैँको टीका लगाउन हिँड्नेको चहलपहल कम

दुर्गापक्षको मुख्य दिन आज मान्यजनको हातबाट नवदुर्गाको प्रसादका रुपमा शुभ साइतको प्रतीक रातो टीका एवं समृद्धिको प्रतीक जमरा लगाउन..

राप्रपा अध्यक्ष थापा अस्पतालबाट डिस्चार्ज

काठमाडौं । राष्ट्रिय प्रजातन्त्र पार्टीका अध्यक्ष कमल थापा अस्पतालबाट डिस्चार्ज भएका छन् । कोरोना संक्रमण..

गैरआवासीय नेपाली नागरिकता ऐन छिट्टै पारित हुने

लन्डन । संघीय संसद्, कानून, न्याय तथा मानव अधिकार समितिका सभापति कृष्णभक्त पोख्रेलले नेपालको संविधान २०७२ मा..

यो साता विदेशमा थप एक नेपालको निधन

लन्डन । विश्वव्यापी महामारी कोरोना भाइरस (कोभिड–१९) संक्रमणबाट यो साता विदेशमा थप एकजना नेपालीको ज्यान गएको छ ।..

कर्णाली सरकारले कोभिड सङ्क्रमितको निःशुल्क उपचार गर्ने

काठमाडौं । कर्णाली प्रदेश सरकारले कोभिड –१९ का लक्षणसहितका बिरामीको निःशुल्क परीक्षण तथा उपचार गर्ने भएको छ ।..