एमालेले कोइरालाको विकल्प खोजेको छैन :: शंकर पोखरेल (सचिव, नेकपा एमाले)

० एमालेको केन्द्रिय समिति बैठकमा वरिष्ठ नेता माधव नेपालले प्रधानमन्त्रीको उम्मेदवारमा सुशील कोइरालाको विकल्प खोजिनुपर्छ भनेर प्रस्ताव गरेको बुझियो, हो ?
– सुशील कोइरालाका नाममा सहमति हुन नसक्ने अवस्थामा के गर्ने भन्ने कुरा छलफलका क्रममा उठाइएको मात्रै हो । यतिबेला लोकतान्त्रिक दलहरुबीच एकताको आवश्यकता र महत्वलाई दृष्टिगत गरी हेर्दा हामी त्यसरी विकल्प खोज्ने पक्षमा छैनौँ । नेपाली कांग्रेससमेत विकल्पमा जान चाहन्छ भने सामूहिक रुपमा विकल्प खोज्ने कुरा अर्कै हो । हामी एक्लैले विकल्पको कुरा गर्नु उपयुक्त हुँदैन ।
० त्यसोभए त्यसरी विकल्प खोजिएको होइन त ?
– कांग्रेसले पनि खोज्छ भने मात्र हो, अन्यथा हामीले त्यस्तो चाहेका छैनौँ । हाम्रो धारणा के चाहिँ हो भने एमाओवादी वर्तमान राजनीतिक समस्या निकासमा गम्भीर छैन, उ सत्ता छोड्न चाहँदैन, यस्तोमा कसरी निकास निकाल्ने भन्नेमा जसरी हुन्छ लोकतान्त्रिक शक्तिहरु मिलेर अगाडि बढ्नु पर्छ ।
० माधव नेपालले त्यस्तो कुरा किन गर्नुभएको होला त ?
– उहाँले आफूले त्यस्तो प्रस्ताव गरेको नभई एमाओवादीको कुरा यस्तो छ भनेर पार्टी मिटिङमा रिपोर्टिङ गर्नुभएको मात्र हो । उहाँले विकल्पको कुरा गरेर कांग्रेस या सुशील कोइरालाभन्दा बाहिर गई उम्मेदवार खोजौँ भन्नुभएको होइन ।
० तर, नेता नेपालले त कोइरालाको नाममा अल्झिरहँदा राजनीतिक गतिरोध लम्बियो भनी सार्वजनिक रुपमा पनि भन्नुभएको छ त ?
– दुनियाँले बुझ्दा उहाँले भनेकै जस्तो नदेखिएको पनि त होइन नि । यसको अन्तर्यचाहिँ यही हो कि एमाओवादी सहमति चाहँदैन । अनेक कुरा गर्दै उ सबैलाई अल्मल्याएर अधिनायकवाद लाद्न उद्यत् छ । जबसम्म एमाओवादी चुनाव पनि नचाहने र सत्ता पनि नछोड्ने नियतअनुरुप क्रियाकलाप गरिरहन्छ तबसम्म सहमति हुन नसक्ने मात्र होइन कि यस्ता अनेक प्रचारबाजी चलिरहन्छ, पार्टी–पार्टीबीच, नेता–नेताबीच विरोधाभास र फुट निम्त्याउने चालबाजी भइरहन्छ भन्ने मेरो ठम्याइ छ ।
० यस्तो अवस्थामा एमाले केन्द्रिय समितिको बैठकले निकासका लागि कस्तो निर्णय गर्छ त ?
– एमालेको निर्णय यथावत छ, यथावत रहन्छ । लोकतान्त्रिक दलहरुबीच एकता र उनीहरुबीचको सहकार्यबाट निकासको बाटो खोज्ने नै हाम्रो पार्टीको अवधारणा हो ।
० एमालेका कतिपय अन्य नेताले पनि कोइरालाको विकल्प खोज्ने पो हो कि भनेर कतिपय औपचारिक या अनौपचारिक अवसरमा कुरा गर्ने गरेका छन्, यसलाई कसरी लिने नि ?
– समस्या हल नभएको अवस्थामा ‘के गर्ने’ भनेर साथीहरुले विभिन्न राय प्रकट गर्नु अस्वाभाविक हुन सक्दैन, तर त्यो हाम्रो पार्टीको औपचारिक निर्णय या धारणा हुन सक्दैन । मूल कुरा माओवादीको दृष्टिकोण के हो, उसको अन्तर्य के हो भन्ने कुरा बुझ्न जरुरी छ सबैले । त्यो नबुझेसम्म अन्य विकल्प खोज्नुको अर्थ पनि रहँदैन । राष्ट्रिय राजनीतिलाई नकारात्मक दिशामा लैजान यतिबेला एमाओवादीको सर्वसत्तावादी आकाङ्क्षा र वाह्य शक्तिको नेपाल राष्ट्रलाई कमजोर पार्ने चालहरु अघिबढिरहेको अवस्थामा एमाले एक्लैले विकल्प दिएर समाधान हुने विषय पनि होइन ।
० यस परिस्थितिमा बाबुराम भट्टराईको सरकार हटाउनका लागि तपाईंहरु कसरी अघि बढ्दैहुनुहुन्छ त ?
– पहिलो त हामी सहमतिका साथ अगाडि बढ्ने भन्ने जुन प्रयास गरियो यो प्रयास असफल हुँदैछ भनी बुझ्दैछौँ हामी । दोस्रो, चार पक्षबीचको प्रयास असफल भएको परिप्रेक्ष्यमा अन्य पार्टीहरुलाई समेत समावेश गरिकन बहुपार्टीबीचको छलफलबाट समाधान खोज्ने बाटोमा पनि अघि बढ्नुपर्छ भन्ने हाम्रो आग्रह रहन्छ । यसमा राष्ट्रपतिको भूमिका के रहन्छ, हामी त्यो हेर्नेछौँ ।
० वास्तवमा यस्तो अवस्थामा राष्ट्रपतिलेचाहिँ के गर्नुपर्ला तपाईंको बिचारमा ?
– राष्ट्रपतिले गर्ने नै के हुन्छ र ? ‘चार पार्टीबीचको प्रयास सफल भएन, अब बहुसंख्यक पार्टीहरु मिलेर के निचोड निकाल्छन् त्यसैलाई विकल्पका रुपमा अडाडि सार्नुपर्छ’ भन्ने त हो ।
० राष्ट्रपतिले नयाँ प्रधानमन्त्री चयन गर्न सक्नुहुन्न भन्ने कुरा पनि त आएका छन् नि ?
– राष्ट्रपति आफैले छान्ने होइन, बहुसंख्यक पार्टीले मिलेर त्यस्तो निर्णय गरे भने त्यसरी अघि बढ्नुपर्ने हुन्छ राष्ट्रपतिले ।
० राष्ट्रपतिलले पनि केही कदम चाल्न नसक्ने र बाबुराम भट्टराईले पनि नछोड्ने अवस्था रहिरहेमा त आन्दोलनमै जाने होला नि तपाईंहरु, होइन ?
– अरु विकल्प त के छ र हामीसँग ? त्यस्तो अवस्थामा त आन्दोलनमा उत्रनुको अन्य विकल्प रहँदैरहन्न ।

२७ पुष २०६९, शुक्रबार ०९:१५ मा प्रकाशित

प्रतिकृया दिनुहोस

विशेष

सबै

यो साता विदेशमा थप एक नेपालको निधन

लन्डन । विश्वव्यापी महामारी कोरोना भाइरस (कोभिड–१९) संक्रमणबाट यो साता विदेशमा थप एकजना नेपालीको ज्यान गएको छ । गैरआवासीय नेपाली..

कर्णाली सरकारले कोभिड सङ्क्रमितको निःशुल्क उपचार गर्ने

काठमाडौं । कर्णाली प्रदेश सरकारले कोभिड –१९ का लक्षणसहितका बिरामीको निःशुल्क परीक्षण तथा उपचार गर्ने भएको छ ।..

घटस्थापनापछि सात दिनमा दुई लाख बढीले छाडे उपत्यका

काठमाडौं । घटस्थापनापछि सात दिनमा दुई लाख बढीले उपत्यका छोडेका छन् । महानगरीय ट्राफिक प्रहरी महाशाखाका अनुसार..

प्रधानमन्त्री केपी शर्मा ओलीद्वारा राष्ट्रको नाममा सम्बोधन (पूर्णपाठसहित)

आदरणीय दिदीबहिनी तथा दाजुभाइहरू, नेपालीहरुको ठूलो चाड, बडादशैं शुरु भइसकेको छ। यस महान् अवसरमा सर्वप्रथम म..

गोरखाबाट हनुमानढोका दरबारका लागि पठाइयो फूलपाती

गोरखा दरबारस्थित दशैँघरबाट काठमाडौँको हनुमानढोका दरबारका लागि फूलपातीसहितको डोली पठाइएको छ । विधिपूर्वक..