नेपालमा सहमतिकै सरकार बन्नुपर्छ :: सलमान खुर्सीद (भारतीय विदेशमन्त्री)

० तपाईंको दृष्टिकोणमा राष्ट्रपति डा. रामवरण यादवको भारत भ्रमण कस्तो रह्यो ?
– महामहिम राष्ट्रपति डा. रामवरण यादवको भारत भ्रमण एकदमै सफल, फलदायी भएको हाम्रो निष्कर्ष छ । यो भ्रमणबाट दुई देशबीचको सम्बन्धमा नयाँ आयाम थपिएको छ । दुई पक्षबीच नेपालको पछिल्लो राजनीतिक घटनाक्रमका साथै सबैजसो विषयमा खुलेर कुराकानी भएका छन् ।
० कुराकानी कुन–कुन विषयमा भए ?
– पहिलो त यो उच्चस्तरीय भ्रमण हो । यसमा दुई देशको सम्बन्धकै विषयमा प्रमुखता साथ कुराकानी भयो । दोस्रो, नेपालको पछिल्लो राजनीतिक घटनाक्रमको विषयमा कुराकानी भयो । त्यसपछि आर्थिक एजेण्डा, ऊर्जासङ्कट, पूर्वसम्झौताको कार्यान्वयनको प्रगतिको विषयमा, खुला सिमानको विषयलगायतमा कुराकानी भए ।
० राजनीतिक विषयमा चाहिँ के–के कुराकानी भए ?
– नेपालको राजनीतिक घटनाक्रमलाई हामीले नजिकबाट नियालिरहेका छौँ । भारतको सर्वसम्मत मत छ– नेपालमा आमसहमति हुनुपर्छ । दलहरूबीचको एकता र सहमतिबाटै निकास निकाल्नुपर्छ । नेपालको राजनीतिक सङ्कट समाधानका लागि राष्ट्रिय सहमतिको सरकार अति आवश्यक छ । त्यतातिर नेपालका दलहरू उन्मुख भएका छन् भन्नेमा हामीलाई लागेको छ । राष्ट्रपतिसँग मेरो
कुरा हुँदा पनि उहाँले सहमति हुन्छ भन्ने विश्वास व्यक्त गर्नुभएको छ । त्यो राम्रो सङ्केत हो । हामी त्यही चाहन्छौँ । नेपालको लोकतन्त्रको संस्थागत विकास गर्न पनि दलहरूबीचको सहमतिमा निर्वाचनको विकल्प छैन । त्यसैले निर्वाचन भएर नयाँ संविधान जारी होस् भन्ने भारतको चाहना छ । त्यसका लागि जस्तोसुकै सहयोग गर्न हामी तयार छौँ ।
० राष्ट्रिय सहमतिको सरकार कसको नेतृत्वमा बन्नुपर्छ भन्ने भारतको दृष्टिकोण छ ?
– कसको नेतृत्वमा सरकार बन्नुपर्छ भन्ने कुरा हामीले भन्ने कुरा होइन । नेपाल स्वतन्त्र र सार्वभौम देश हो, कसलाई प्रधानमन्त्री बनाउने, कसको नेतृत्वमा सरकार बन्ने भन्ने कुरा त्यहीँका राजनीतिक दलले गर्ने कुरा हो । नेपालमा को प्रधानमन्त्री बन्ने भन्ने कुरा हाम्रो चासोको विषय होइन । भारतको प्रस्ट दृष्टिकोण छ– दलहरू मिलून् र सहमति निर्माण गरेर निर्वाचन गराऊन् । त्यो हाम्रो चासोको विषय हो ।
० तपाईंहरूमाथि प्रधानमन्त्री डा. बाबुराम भट्टराई नेतृत्वको सरकारलाई टिकाइरहनुभएको भन्ने आरोप छ नि ?
– नेपालमा को प्रधानमन्त्री रहिरहनुपर्छ र को हुनुपर्छ भन्ने पक्ष र विपक्षीमा भारत छैन । हामीले कसैलाई सत्तामा टिकाइराख्ने र कसैलाई बनाउने भन्ने कुरामा भारतको कुनै भूमिका रहँदैन । सबै प्रस्ट हुनुपर्छ । नेपालको समस्या नेपालीले नै समाधान गर्नुपर्छ । सरकार पनि उहाँहरू आफैँ मिलेर बनाउनुपर्छ, त्यसमा भारतको नाम जोडेर विश्लेषण गर्नु राम्रो हुँदैन । त्यसैले हामीले पहिलादेखि नै भन्दै आएका छौँ– हामी नेपालमा राजनीतिक स्थायित्व चाहन्छौँ । दलहरूको एकतामा सम्पन्न नेपाल भएको हेर्न चाहन्छांै । अब भारतको एउटै चाहना छ– नेपालले आर्थिक प्रगति गरोस् । त्यसका लागि हामी सक्दो सहयोग गर्छौं । आज म तपार्इंमार्फत एउटा कुरा प्रस्ट गर्न चाहन्छु– अब भारत कसैको पक्ष र विपक्षमा उभिँदैन । सबैको पक्षमा एकता चाहन्छ र सम्पन्न नेपाल चाहन्छ ।
० राष्ट्रपतिले सहमतिका लागि समय दिएकोदियै गर्ने तर दलहरूबीच सहमति हुन नसक्दा भारतको नाम पनि जोडेर हेर्ने गरिन्छ नि ?
– कसले कसरी हेर्छन् भन्ने कुरा व्यक्तिको दृष्टिकोणमा भर पर्छ । नेपालको राजनीतिक घटनाको क्रममा हाम्रो चासो र जिज्ञासा छ कारण नेपाल हाम्रो असल छिमेकी हो । सदियौँदेखिको ऐतिहासिक सुमधुर सम्बन्ध छ । त्यो सम्बन्ध प्रगाढ छ र रहिरहने छ । जे कुरामा पनि नेपालको विषयमा भारतको नाम जोड्दा राम्रो हुँदैन । नेपालको आन्तरिक राजनीतिमा कुनै किसिमको हस्तक्षेप रहेको थिएन, छैन र रहँदैन पनि ।
० नेपालमा निर्वाचन होला जस्तो लाग्छ कि लाग्दैन ?
– हाम्रो चाहना हो, नेपालमा छिटो निर्वाचन हुनुपर्छ । निर्वाचन गर्ने काम दलहरूको हो । दलहरूबीच एकता भएर निर्वाचन भयो भने नेपालको लोकतन्त्र बलियो हुन्छ । लोकतन्त्र बलियो भयो भने मात्रै नेपालको भविष्य उज्ज्वल हुन्छ ।
० राष्ट्रपतिको भ्रमणको उपलब्धिचाहिँ के हो ?
– महामहिम राष्ट्रपतिको यो सद्भाव भ्रमण हो । मैले पहिला नै भनेको छु फलदायी र उपलब्धि भएको छ र दुई देशलाई एक–अर्कालाई बुझ्न मद्दत पनि गरेको छ ।
० राष्ट्रपतिको प्रयासलाई तपाईंहरूको समर्थन छ अरे नि त ?
– नेपालका राष्ट्रपति डा. रामवरण यादव असल व्यक्तित्वका धनी हुनुहुँदोरहेछ । उहाँको शालीन र शिष्ट व्यक्तित्वबाट म पनि प्रभावित भएको छु । उहाँले सहमतिका लागि गर्नुभएको प्रयास प्रशंसनीय र सराहनीय छ । त्यसको हामी समर्थन गर्छौं ।
० तपाईं नेपाल कहिले आउनुहुन्छ ?
– नेपालमा छिटो सहमति भए र सहमतिमै राष्ट्रिय सहमतिको सरकार र निर्वाचनको घोषणा भएपछि म नेपाल आउँछु । मेरो नेपाल आउने चाहना छ, त्यो छिट्टै पूरा हुन्छ ।
– आर. धमला

१८ पुष २०६९, बुधबार ०८:४९ मा प्रकाशित

प्रतिकृया दिनुहोस

विशेष

सबै

दशैँको टीका लगाउन हिँड्नेको चहलपहल कम

दुर्गापक्षको मुख्य दिन आज मान्यजनको हातबाट नवदुर्गाको प्रसादका रुपमा शुभ साइतको प्रतीक रातो टीका एवं समृद्धिको प्रतीक जमरा लगाउन..

राप्रपा अध्यक्ष थापा अस्पतालबाट डिस्चार्ज

काठमाडौं । राष्ट्रिय प्रजातन्त्र पार्टीका अध्यक्ष कमल थापा अस्पतालबाट डिस्चार्ज भएका छन् । कोरोना संक्रमण..

गैरआवासीय नेपाली नागरिकता ऐन छिट्टै पारित हुने

लन्डन । संघीय संसद्, कानून, न्याय तथा मानव अधिकार समितिका सभापति कृष्णभक्त पोख्रेलले नेपालको संविधान २०७२ मा..

यो साता विदेशमा थप एक नेपालको निधन

लन्डन । विश्वव्यापी महामारी कोरोना भाइरस (कोभिड–१९) संक्रमणबाट यो साता विदेशमा थप एकजना नेपालीको ज्यान गएको छ ।..

कर्णाली सरकारले कोभिड सङ्क्रमितको निःशुल्क उपचार गर्ने

काठमाडौं । कर्णाली प्रदेश सरकारले कोभिड –१९ का लक्षणसहितका बिरामीको निःशुल्क परीक्षण तथा उपचार गर्ने भएको छ ।..