छोड्ने बेला गाह्रै हुन्छ :: डा. रामशरण महत

० राष्ट्रपतिले दिएको चौथोपटकको म्याद समाप्त हुँदै गर्दा प्रमुख दलहरुबीच सहमति हुने चर्चा निकै चलेको थियो, तर त्यो हल्ला पनि निरर्थक भयो, के फेरि पनि सहमति भाँडिएको हो ?
– सहमति भाँडियो नै त म भन्न सक्दिन, तर यसमा केही व्यवधान भने निस्केका छन् । मलाई जानकारी प्राप्त भएअनुसार प्रधानमन्त्री बाबुराम भट्टराई सहमतिका लागि तयार भइसक्नुभएको छैन । उहाँ नयाँ–नयाँ शर्तहरु थप्दै हुनुहुन्छ । विगतमा एमाओवादी नेतृत्वसँग भएको समझदारीका बेला त उहाँ पनि संलग्न हुनुहुन्थ्यो, तर अहिले आएर फेरि सरकार नछोड्ने बरु यही सरकारमा केही दिनका लागि भए पनि एमाले र कांग्रेस सहभागी भइदिएर सहमतिको स्वरुप दिनुपरयो भन्ने शर्त उहाँबाट तेस्र्याइन थालिएको छ, जो कि उचित होइन र हामी यसका लागि तयार छौनौँ ।
० कागजी सम्झौताका भरमा मात्र संघीयताविरोधिलाई म कुर्सी सुम्पन सक्दिनँ भनेर प्रधानमन्त्रीले त गम्भीर कुरा उठाउनुभएको छ नि ?
– संघीयताविरोधि को हो र को होइन, संघीयतालाई एउटा सत्ता कब्जा गर्ने भरयाङको रुपमा मात्रै कसले उपयोग गर्दैछ भन्ने त इतिहासले प्रमाणित गर्दैछ । त्यसैले यस्ता बखेडा झिक्नु सरासर राजनीतिक बेइमानी हो । हामी यसलाई उचित ठान्दैनौँ । तै पनि एउटा सहमतिमा प्रवेश गर्न लागेको र निर्वाचनका लागि निश्पक्ष सरकार निर्माणको कार्यमा लागेको सन्दर्भमा विवाद बढाउने काम हामी गर्दैनौँ । तर कसैले विवाद जानीबुझीकन बढाउन खोज्छ भने त त्यसलाई हामी स्वीकार गर्दैनौँ ।
० तपाईंहरुको यस्तो अडानले बन्न लागेको सहमतिमा हलो अड्काउने भयो नि त ?
– हलो अड्काउने प्रयास हामीबाट होइन अन्यत्रैबाट गरिँदैछ । राजनीतिमा कसैको एकपक्षीय प्रयासले मात्र हुँदैन, चारैतिरको जनदबाव। राजनीतिक दबाव भइसकेपछि जो आवश्यक पर्छ त्यही हुन्छ नै । मेरो दृष्टिमा अहिले चारैतिरबाट चर्को दबाव छ कि यो सरकारको बहिर्गमन भएर सहमतिको नयाँ सरकार बनोस् भनेर । अहिले अलमल गराउनुको मतलब हुन्छ– सहमति हुनै नदिने र निर्वाचन गर्नै नदिने । त्यसकारण यसप्रकारको षडयन्त्रलाई कसैले पनि स्वीकार गर्न सक्दैन । आज सरारा जनता नयाँ जनताको प्रतीक्षामा छन् । यसका लागि कांग्रेसको नेतृत्वको सरकार हुनुपर्नेमा सबैबाट स्वीकारोक्ति भइसकेको छ । यसका आधारमा मलाई विश्वास छ बाबुराम भट्टराई सत्ता छोड्न अन्ततः तयार हुनुहुनेछ ।
० प्रधानमन्त्रीले त कांग्रेस–एमाले यही सरकारमा आउनुपर्ने, निर्वाचनको तिथि तोकिनुपर्ने अनि सत्ता छोड्ने त्यो पनि मधेसी नेतृत्वको हातमा भनेर भन्नुभएको छ, के भन्नुहुन्छ तपाईं ?
– यो बकवासबाहेक केही हुन सक्दैन । यस्तो किन भनेको हो उहाँले मात्रै बुझ्नुहोला । निर्वाचन अड्काउने रणनीति हो भने यो सफल हुन सक्दैन । उहाँले आजभन्दा धेरै अगाडि राजीनामा दिइसक्नुपथ्र्यो । सबै दलहरुलाई झुक्याएर मंसिर ७ को निर्वाचन मिति तोक्ने व्यक्तिले निर्वाचन गर्न नसक्ने, आफ्नो सरकारलाई यतिका समयसम्म राजनीतिक स्वरुप दिन नसक्ने, अनि फेरि अहिले आएर आफ्नै सरकारमा आउ भन्नु त सरासर राजनीतिक बेइमानी हो, यो सम्भव छैन । उहाँको सरकारमा हामी पपहिले गइसकेकै हौँ ।
० बाधाअडकाउ फुकाउन आफैले पाउनुपरयो भन्नुभएको छ प्रधानमन्त्रीले, यो जायज होइन ?
– फुकाइसक्नुभयो नि उहाँले बाधाअडकाउ त, त्यत्रो संविधानसभा नै अन्त्य गरिदिनुभयो, योभन्दा ठूलो ‘बाधाअडकाउ फुकाउ’ अरु के हुनसक्ला ? जुन संवैधानिक निकायले उहाँलाई निर्वाचित गरयो त्यसैलाई समाप्त पारिदिनुभयो, आफ्नो प्रधानमन्त्रीत्वलाई निरन्तरता दिनका लागि त्यत्रो निकाय भंग गराइसक्नुभयो । अब राजनीतिक दबावबाट निस्कने सहमतिका आधारमा नयाँ सरकार बन्ने उपक्रम छ, त्यसलाई पनि अनेक बखेडा झिकेर उहाँ बिथोल्न खोज्नुहुन्छ भने हामी किमार्थ स्वीकार गर्दैनौँ ।
० अहिलेको स्थितिमा कांग्रेस सभापति सुशील कोइरालालाई प्रधानमन्त्री बनाउन किन नचाहेको होला डा. भट्टराईले ?
– त्यसको जवाफ स्पष्टै छ नि, उहाँ आफू सत्ता छोड्नै चाहनुहुन्न अनि अरुलाई त्यहाँ पुरयाउन कसरी चाहनु त उहाँले ? सत्ता छोड्न नचाहेकोले नै संसदको अन्त्य गरिदिनुभएको हो । तर, यतिखेर म पुनः यो विषयलाई चर्काउने पक्षमा छैन । बरु यही आशा र विश्वास व्यक्त गर्न चाहन्छु कि डा. बाबुराम भट्टराईले अन्ततः कुर्सी छोड्नुहुनेछ, छोड्नै पर्छ । छोड्ने बेलामा मानिसलाई अलिक गाह्रो पनि हुन्छ, कतिपय आफ्नाहरुले ‘नछोड’ भनेर उक्साइरहेका पनि हुनसक्छन्, तर छोड्नैपर्छ नि ।
० मैले बाबुरामजीलाई मनाउन सकिनँ, अब कांग्रेस–एमालेहरुले मनाउनुपरयो भन्नुभएको छ प्रचण्डजीले त ?
– अब जनताको दबावले मनाउने छ बाबुरामजीलाई । यतिका दलहरुले छोड भनिसकेपछि एक्लै सत्तामा बसिरहन्छु भनेर चल्नेवाला छैन ।
० फेरि पनि म्याद थप्ने कुरो आइरहेको छ नि ?
– म त म्याद थप्नुपर्छ भन्ने पक्षमा छैन, म्याद मात्र थपेर समाधान हुने देखिएन । संविधानको धारा ३८ (२) बमोजिम अब राष्ट्रपतिले राजनीतिक दलहरुसँग परामर्श गरेर जसको पक्षमा बहुमत निस्कन्छ त्यसैबाट प्रधानमन्त्री घोषणा गरिदिनुपर्छ भन्ने मेरो विचार हो । यो तमासा लामो समयसम्म चल्न दिनुहुन्न ।

३ पुष २०६९, मंगलवार ०९:१३ मा प्रकाशित

प्रतिकृया दिनुहोस

विशेष

सबै

चन्द्रमामा मानव जीवनको सम्भावनातर्फ नयाँ खुट्किलो : नासा

न्यूयोर्क । अमेरिकी अन्तरिक्ष एजेन्सी नासाले चन्द्रमाको सतहमा पानी रहेको पुष्टि गरेको छ । पानीको केमिकल कम्पाउण्ड पाइनु त्यहाँ..

दशैँको टीका लगाउन हिँड्नेको चहलपहल कम

दुर्गापक्षको मुख्य दिन आज मान्यजनको हातबाट नवदुर्गाको प्रसादका रुपमा शुभ साइतको प्रतीक रातो टीका एवं..

राप्रपा अध्यक्ष थापा अस्पतालबाट डिस्चार्ज

काठमाडौं । राष्ट्रिय प्रजातन्त्र पार्टीका अध्यक्ष कमल थापा अस्पतालबाट डिस्चार्ज भएका छन् । कोरोना संक्रमण..

गैरआवासीय नेपाली नागरिकता ऐन छिट्टै पारित हुने

लन्डन । संघीय संसद्, कानून, न्याय तथा मानव अधिकार समितिका सभापति कृष्णभक्त पोख्रेलले नेपालको संविधान २०७२ मा..

यो साता विदेशमा थप एक नेपालको निधन

लन्डन । विश्वव्यापी महामारी कोरोना भाइरस (कोभिड–१९) संक्रमणबाट यो साता विदेशमा थप एकजना नेपालीको ज्यान गएको छ ।..